ពិធីកាត់ចំណងដៃ
តាមគន្លងប្រពៃណីទំនៀមទម្លាប់ ពិធីចងដៃបាចផ្កាស្លាឱ្យពរជ័យកូនកំលោះកូនក្រមុំតែងបញ្ចប់ទៅដោយបន្សល់នូវអំបោះច្រើនខ្សែ ចងជាប់នឹងកដៃគូស្វាមីភរិយារៀងៗខ្លួន។ អំបោះទាំងនេះ ពេលខ្លះគេប្រើពណ៌ស តែពេលខ្លះគេនិយមប្រើពណ៌ក្រហម។ ការប្រើពណ៌ស ឬក្រហម គឺអាស្រ័យលើជំនឿបុគ្គល ដ្បិតអ្នកមានពូជពង្សវង្សត្រកូលជាប់សែស្រឡាយចិន គេច្រើនរាប់អានពណ៌ក្រហម ព្រោះជាពណ៌មង្គលក្នុងផ្នត់គំនិតចិន។ ផ្ទុយមកវិញ បើតាមលំអានបុរាណាចារ្យខ្មែរ ក្នុងពិធីចងដៃលោកឱ្យប្រើអំបោះពណ៌ស ជាអំបោះឆៅមិនទាន់ជ្រលក់ពណ៌ ព្រោះអំបោះនេះមានអត្ថន័យនិងខ្លឹមសារជ្រៅក្នុងអារ្យធម៌ខ្មែរ ដែលសព្វថ្ងៃជាតិសាសន៍ក្បែរខាងយើងគេនៅនិយមរាប់អានអំបោះពណ៌សនេះក្រៃលែងណាស់។ ប៉ុន្តែផ្ទុយទៅវិញ មានមួយភាគខ្លះក្នុងសង្គមខ្មែរប្រែជាច្រឡំថា អំបោះពណ៌សប្រើតែក្នុងពិធីបុណ្យសពប៉ុណ្ណោះ។
Leave a Comment